ಹಿಂದೂ ಮಹಾಗಣಪತಿ ಶೋಭಾಯಾತ್ರೆ ವೇಳೆ ಸೇರಿದ್ದ ಜನಸ್ತೋಮದಿಂದ ನಗರದಲ್ಲಿ ಕಸದ ರಾಶಿ

ಚಿತ್ರದುರ್ಗ: ನಗರದಲ್ಲಿ ನಡೆದ ಹಿಂದೂ ಮಹಾಗಣಪತಿ ಬೃಹತ್ ಶೋಭಾಯಾತ್ರೆ ವೇಳೆ ಸೇರಿದ್ದ ಜನಸ್ತೋಮದಿಂದಾಗಿ ಶೋಭಾಯಾತ್ರೆ ಸಾಗಿದ ರಸ್ತೆಗಳಲ್ಲಿ ಕಸದ ರಾಶಿ ತುಂಬಿತ್ತು. ಆದರೆ ಶೋಭಾಯಾತ್ರೆ ನಡೆದ ಮರುದಿನ ಮುಂಜಾನೆಯೇ ಪೌರಕಾರ್ಮಿಕರು ತಮ್ಮ ಕೆಲಸ ಮಾಡಿ ನಾಲ್ಕೈದು ಗಂಟೆಗಳಲ್ಲಿ ಇಡೀ ನಗರವನ್ನು ಸ್ವಚ್ಛ ಮಾಡುವ ಮೂಲಕ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ಶನಿವಾರ ನಡೆದ ಶೋಭಾಯಾತ್ರೆ ವೇಳೆ ಸೇರಿದ್ದ ಜನರಿಂದಾಗಿ ನಗರದ ಪ್ರಮುಖ ರಸ್ತೆ ಇಕ್ಕಿಲುಗಳಲ್ಲಿ ಚಪ್ಪಲಿ, ನೀರಿನ ಬಾಟಲ್, ಪೇಪರ್ ಸೇರಿದಂತೆ ಹಲವು ವಸ್ತುಗಳಿಂದ ತುಂಬಿ ಹೋಗಿದ್ದ ರಸ್ತೆಗಳನ್ನು ಮರು ದಿನವಾದ ಭಾನುವಾರ ಕೆಲವೇ ಗಂಟೆಗಳಲ್ಲಿ ಸ್ವಚ್ಛ ಮಾಡಿದ್ದಾರೆ. ಭಾನುವಾರ ಬೆಳಗ್ಗೆ ಪೌರಕಾರ್ಮಿಕರ ಜೊತೆಗೆ ಸಂಸದ ಗೋವಿಂದ ಕಾರಜೋಳ ಪುತ್ರ ಉಮೇಶ್ ಕಾರಜೋಳ ಸಹ ಸಾಥ್ ನೀಡಿ, ಸ್ವಚ್ಛತೆಯ ಕಾರ್ಯ ಮುಗಿದ ಬಳಿಕ ಪೌರಕಾರ್ಮಿಕರ ಜೊತೆ ಮಾತನಾಡಿ ಅವರ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.