ಸರ್ಕಾರದ ವಿರುದ್ಧ ಹಿರಿಯ ಶಾಸಕ ಅಸಮಾಧಾನ – ಅನುದಾನ ಸಿಗದಿದ್ದಕ್ಕೆ ಆಕ್ರೋಶ

ಚಿತ್ರದುರ್ಗ: ಸರ್ಕಾರ ಅಧಿಕಾರಕ್ಕೆ ಬಂದಾಗಿನಿಂದ ಹಲವು ಶಾಸಕರು, ಸಚಿವರು ಸರ್ಕಾರ ಅನುದಾನ ನೀಡದಿರುವುದಕ್ಕೆ ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದರು. ಈಗ ಮತ್ತೆ ಮೊಳಕಾಲ್ಮುರು ಹಿರಿಯ ಶಾಸಕ ಎನ್ ವೈ ಗೋಪಾಲಕೃಷ್ಣ ಮತ್ತೊಮ್ಮೆ ಸರ್ಕಾರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಮೊಳಕಾಲ್ಮುರು ತಾಲ್ಲೂಕಿನ ಕಣಕುಪ್ಪೆಯಲ್ಲಿ ನಡೆದ ಟೂಲ್ ಫ್ಯಾಬ್ ಕಂಪನಿಯ ಉದ್ಘಾಟನಾ ಸಮಾರಂಭದಲ್ಲಿ ಭಾಗಿಯಾಗಿ ಭಾಷಣ ಮಾಡುವ ವೇಳೆ ಎನ್ವೈ ಗೋಪಾಲಕೃಷ್ಣ ನಾನು ಶಾಸಕ ಆಗಿದ್ರು ನಮ್ಮ ಊರಲ್ಲಿ ಒಂದು ಚರಂಡಿ, ರಸ್ತೆ ಮಾಡಕ್ಕಾಗುತ್ತಿಲ್ಲ, ಕಣ್ಣಿಗೆ ಕಾಣುವಂತೆ ಒಂದು ಶಾಲೆ ಕಟ್ಟಕ್ಕಾಗಲ್ಲ, ಈಗ ನಾಲ್ಕಾಣೆ ಕೆಲಸ ಆಗಿದೆ ಇನ್ನು ಹನ್ನೆರೆಡಾಣೆ ಕೆಲಸ ಬಾಕಿ ಇದೆ ಎಂದು ಪರೋಕ್ಷವಾಗಿ ಸರ್ಕಾರ ಅನುದಾನ ನೀಡುತ್ತಿಲ್ಲ ಎಂದು ಸರ್ಕಾರಕ್ಕೆ ತಿವಿದಿದ್ದಾರೆ. ತಮ್ಮದೇ ಸರ್ಕಾರವನ್ನು ಟೀಕಿಸಿದ ಶಾಸಕ ಎನ್ ವೈ ಗೋಪಾಲಕೃಷ್ಣ ಅವರ ವಿಡಿಯೋವನ್ನು ವಿರೋಧ ಪಕ್ಷದ ಮುಖಂಡರು, ನಾಯಕರು ಸರ್ಕಾರದ ವಿರುದ್ಧ ಅಸ್ತ್ರವಾಗಿಸಿಕೊಂಡು ವಾಗ್ದಾಳಿ ನಡೆಸಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ.