ರಾಮಾಯಣ ಚಿತ್ರಕ್ಕೆ ರಾಮ ರಾವಣರು ಪಡೆದ ಸಂಭಾವನೆ ಎಷ್ಟು ಗೊತ್ತಾ…?

ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ರಾಮಾಯಣ ಚಿತ್ರದ ಮೊದಲ ಟೀಸರ್‌ ಈಗಾಗಲೇ ಬಿಡುಗಡೆ ಆಗಿ ಭಾರಿ ಸದ್ದು ಮಾಡುತ್ತಿದೆ. ಭಾರತದ ಅತ್ಯಂತ ದುಬಾರಿ ಚಿತ್ರ ಎಂದು ಹೇಳುತ್ತಿರುವ ಈ ಸಿನಿಮಾಗೆ ಬರೋಬ್ಬರಿ 1600 ಕೋಟಿ ಬಜೆಟ್ ಹಾಕಲಾಗಿದೆ ಎಂಬ ಸುದ್ದಿ ಹರಿದಾಡುತ್ತಿದೆ. ಸದ್ಯ ಚಿತ್ರದ ತಾರಾಬಳಗದ ಸಂಭಾವನೆ ಮೂಲಕ ಸುದ್ದಿಯಾಗಿದೆ. ರಣಬೀರ್ ಕಪೂರ್ ಮತ್ತು ಸಾಯಿ ಪಲ್ಲವಿಯಿಂದ ಹಿಡಿದು ರಾಕಿಂಗ್‌ ಸ್ಟಾರ್‌ ಯಶ್ ಮತ್ತು ಸನ್ನಿ ಡಿಯೋಲ್‌ವರೆಗೆ ಪ್ರತೊಯೊಬ್ಬರಿಗೂ ಕೋಟಿ ಕೋಟಿ ಹಣ ನೀಡಲಾಗುತ್ತಿದೆ.

ರಣಬೀರ್ ಕಪೂರ್ – 150 ಕೋಟಿ 

ರಾಮನ ಪಾತ್ರದಲ್ಲಿ ನಟಿಸುತ್ತಿರುವ ರಣಬೀರ್ ಕಪೂರ್ ಸಂಭಾವನೆಗೆ ಒಂದೊಳ್ಳೆ ಬಿಗ್‌ ಬಜೆಟ್‌ ಸಿನಿಮಾ ಮಾಡಬಹುದು. ಸಿಯಾಸತ್.ಕಾಮ್ ವರದಿಗಳ ಪ್ರಕಾರ, ಎರಡು ಭಾಗಗಳ ಮಹಾಕಾವ್ಯದ ಪ್ರತಿ ಭಾಗಕ್ಕೆ ರಣಬೀರ್ 75 ಕೋಟಿ ರೂ.ಗಳನ್ನು ಪಡೆಯುತ್ತಿದ್ದಾರೆ. ಇದರರ್ಥ ರಾಮಾಯಣಕ್ಕಾಗಿ ಅವರ ಒಟ್ಟು ಸಂಭಾವನೆ 150 ಕೋಟಿ ರೂ.ಗಳಾಗಿದ್ದು, ಅವರು ಚಿತ್ರದಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟರಾಗಿದ್ದಾರೆ ಎಂದು ಸಿಯಾಸತ್ ವರದಿ ಮಾಡಿದೆ .

 ಸಾಯಿ ಪಲ್ಲವಿ – 12 ಕೋಟಿ ರೂ.

ಸೀತಾ ದೇವಿಯ ಪಾತ್ರದಲ್ಲಿ ನಟಿಸಿರುವ ಸಾಯಿ ಪಲ್ಲವಿ, ಈ ಚಿತ್ರದಲ್ಲಿ ಪ್ರತಿ ಭಾಗಕ್ಕೂ 6 ಕೋಟಿ ರೂಪಾಯಿ ಸಂಭಾವನೆ ಪಡೆದಿದ್ದಾರೆ ಎಂದು ವರದಿಯಾಗಿದೆ. ರಣಬೀರ್ ಕಪೂರ್ ಎದುರು ನಟಿಸಲು ಸಾಯಿ ಪಲ್ಲವಿ ಒಟ್ಟು 12 ಕೋಟಿ ರೂಪಾಯಿಗಳನ್ನು ಪಡೆಯಲಿದ್ದಾರೆ.

ಯಶ್ – 100 ಕೋಟಿ ರೂ.

ಕನ್ನಡದ ಸೂಪರ್‌ಸ್ಟಾರ್ ಯಶ್ ರಾವಣನ ಪಾತ್ರದಲ್ಲಿ ನಟಿಸುವುದಲ್ಲದೆ, ತಮ್ಮ ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಅವರು ಪ್ರತಿ ಭಾಗಕ್ಕೆ 50 ಕೋಟಿ ರೂ. ಪಡೆಯುತ್ತಿದ್ದಾರೆ. ರಾಮಾಯಣದಿಂದ ಅವರ ಒಟ್ಟು 100 ಕೋಟಿ ರೂ. ಸಂಭಾವನೆ ಪಡೆಯಲಿದ್ದಾರೆ ಎಂದು ವರದಿಯಾಗಿದೆ. ಅಲ್ಲದೇ ಸಹ ನಿರ್ಮಾಪಕರಾಗಿರುವ ಕಾರಣ ಯಶ್‌ಹೆಚ್ಚು ಹಣವನ್ನು ರಾಮಾಯಣ ಸಿನಿಮಾದಿಂದ ಪಡೆಯಲಿದ್ದಾರೆ.

ಸನ್ನಿ ಡಿಯೋಲ್ – 40 ಕೋಟಿ ರೂ.

ಹಿರಿಯ ನಟ ಸನ್ನಿ ಡಿಯೋಲ್ ಹನುಮಂತನ ಪಾತ್ರದಲ್ಲಿ ನಟಿಸಲಿದ್ದಾರೆ. ವರದಿಗಳ ಪ್ರಕಾರ, ಸನ್ನಿ ಡಿಯೋಲ್ ಪ್ರತಿ ಭಾಗಕ್ಕೂ 20 ಕೋಟಿ ರೂ ಪಡೆಯಲಿದ್ದು, ಅವರ ಪ್ರಮುಖ ಪಾತ್ರಕ್ಕಾಗಿ ಒಟ್ಟು 40 ಕೋಟಿ ರೂ. ಪಡೆಯುತ್ತಿದ್ದಾರೆ.

ರವಿ ದುಬೆ 4 ಕೋಟಿ ರೂ

ರವಿ ದುಬೆ ಲಕ್ಷ್ಮಣನಾಗಿ ಕಾಣಿಸಿಕೊಳ್ಳಲಿದ್ದಾರೆ. ಅವರು 2–4 ಕೋಟಿ ರೂ.ಗಳ ನಡುವೆ ಸಂಭಾವನೆ ಪಡೆಯುತ್ತಿದ್ದಾರೆ ಎಂದು ವರದಿಯಾಗಿದೆ. ಆದಾಗ್ಯೂ, ಈ ಮೊತ್ತವು ಕೇವಲ ಒಂದು ಕಂತಿಗೆ ಅಥವಾ ಎರಡಕ್ಕೂ ಸಂಭಾವನೆ ಪಡೆಯುತ್ತಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ನಿತೇಶ್ ತಿವಾರಿ ನಿರ್ದೇಶನದ ಮತ್ತು ನಮಿತ್ ಮಲ್ಹೋತ್ರಾ ನಿರ್ಮಾಣದ ರಾಮಾಯಣ ಸಿನಿಮಾ ಮೊದಲ ಭಾಗವು 2026 ರ ದೀಪಾವಳಿಗೆ ಬಿಡುಗಡೆಯಾಗಲಿದ್ದು , ಎರಡನೇ ಭಾಗ 2027ರ ದೀಪಾವಳಿಗೆ ಬಿಡುಗಡೆಯಾಗಲಿದೆ.